Verklagsreglur um fjarveru starfsmanna vegna ...

Fjármála – og efnahagsráðuneytið sendi nýverið frá sér tilmæli til stofnana um efni bókunar  nr. 3 í kjarasamningi SFR og ríkisins frá 2011. Í bókuninni segir að Fjármáalráðneyti muni beita sér fyrir því að stofnanir ríkisins setji verklagsreglur, svo sem um fjarveru starfsmanns vegna áfengismeðferðar, andláts nákomins ættingja, tæknifrjóvgunar o.fl. Um er að ræða málefni sem lengi hafa brunnið á félagsmönnum SFR og því fagnaðarefni að umrætt mál sé komið á skrið.

Í bréfi ráðuneytisins til stofnana er lögð áhersla á að mótun starfsmannastefnu sé í höndum stofnananna sjálfra, en í tilmælunum er þó lögð áhersla á að stofnanir setji sér reglur um þau málefni sem tilgreind eru í bókuninni. Ráðuneytið gefur stofnunum ákveðnar viðmiðunarreglur, til dæmis er mælt með því að ekki sé um fasta reglu að ræða þegar kemur að því að meta fjarvistir starfsmanns vegna andláts nákomins ættingja, heldur séu þar settar meginreglur og þess gætt að grunnur slíkrar reglu tryggi jafnræði meðal starfsmanna og gætt sé að almennum mannúðarsjónarmiðum. Önnur efni sem sérstaklega eru tiltekin í bréfi ráðuneytisins og fjalla þarf um í starfsmannastefnu eða verklagsreglum stofnana vegna bókunarinnar er m.a. fjarvera vegna tæknifrjóvgunar, áfengismeðferðar og önnur fjarvera starfsmanns vegna atburða eða áfalla í einkalífi sem stofnanir ættu að taka tillit til í starfsmannastefnu sinni.