Kraftmiklir félagsfundir á Landspítala

     

SFR stéttarfélag í almannaþjónustu átti tvo kraftmikla fundi í gær með félagsmönnum sínum sem starfa hjá Landspítala. Fundarefnið var launa- og kjaramál, enda liggur fyrir loforð frá ráðherra um að laun kvennahópa innan SFR hjá LSH verði leiðrétt. Stjórnendur LSH könnuðust hins vegar ekki við það og sögðu loforð ráðherra ekki hafa borist þeim.

Félagsmenn SFR á fundunum tveimur í gær voru einhuga og sendu frá sér eftirfarandi ályktun þar sem yfirlýsingu stjórnavalda um leiðréttingu kynbundins launamunar var fagnað og ráðherra var minntur á loforð sitt.

Ályktun frá fundum félagsmanna SFR hjá LSH í gær:

SFR stéttarfélag fagnar yfirlýsingu stjórnvalda frá 13. febrúar, um að kynbundinn launamunur verði leiðréttur. Þar eru heilbrigðisstéttir sérstaklega tilgreindar. Um 900 starfsmenn Landspítala eru félagsmenn í SFR stéttarfélagi. Um 70% þeirra eru konur.

SFR stéttarfélag fer fram á að viðræður um stofnanasamning SFR við Landspítala verði hafnar án tafar. Fjármálaráðherra hefur þegar staðfest að kjör kvenna innan SFR hjá Landspítala verði leiðrétt í kjölfar nýgerðra samninga hjúkrunarfræðinga. SFR minnir á að yfirlýsing stjórnvalda um leiðréttingar á launum kvenna nær til allra félaga.