Ráðstefna um Vinnuvernd

Fjölmenni er á ráðstefnu um Stefnumótun í vinnuvernd sem hófst nú um hádegið á Grand hótel. Markmið ráðstefnunnar er að kalla eftir áhersluatriðum í vinnuvernd frá sem flestum aðilum á íslenskum vinnumarkaði og marka með því stefnu til framtíðar. Ráðstefnan hófst með ávarpi Eyglóar Harðardóttur ráðherra.

Í ávarpi sínu fagnaði ráðherra komandi stefnumótun og sagði afar áríðandi að hafa skýra sýn og markvissa stefnu í þessum málaflokki. Okkur er einnig mikilvægt að muna að, sagði Eygló, að vinnustaðir bera ríka ábyrgð á velferð starfsmanna sinna. Vandasamasti hlutinn er að gera stefnuna að menningu vinnustaðar. Þar þurfa allir að ganga í takt. Vinnuvernd snýr að öllum þáttum í vinnuumhverfinu og öllum þessum þáttum þarf að sinna. Eygló lagði áherslu á að velgengni vinnustaða ylti á starfsfólkinu og því væri góður aðbúnaður þeirra lykilatriði.

Að loknu ávarpi ráðherra verða nokkur stutt inngangserindi m.a. um samstarf atvinnulífs og Vinnueftirlits, skipulag vinnuverndarstarfs á vinnustöðum, áhættumat á vinnustað, atvinnusjúkdóma og álag og vinnuslys – núll-slysastefnu. Að þeim loknum hefst umræða í vinnuhópum, en ráðstefnunni lýkur kl. 16.