28. febrúar 2014
Breytingar hjá sýslumannsembættunum
Fyrir Alþingi liggur frumvarp þar sem gert er ráð fyrir að sýslumannsembættunum verði fækkað úr 24 í 9. Þessi ætlan stjórnvalda hefur legið fyrir lengi og nú virðast vera nokkrar líkur á því að málið muni fara í gegnum þingið á vormánuðum. Formaður SFR og sérfræðingur frá SFR fóru á fund allsherjar- og menntamálanefndar Alþingis í síðast liðinni viku til þess að fylgja eftir umsögn félagsins um frumvarpið. Þar lögðu þau áherslu á að við breytingarnar yrði engum starfsmönnum sagt upp og að vandað yrði til hvað mannauðsþáttinn varðar í breytingarferlinu.
Í kjölfarið óskaði SFR eftir fundi með innanríkisráðuneytinu til þess að fá frekari upplýsingar um hvar málið væri statt í dag og hvernig framkvæmdin yrði hugsuð. Sá fundur átti sér stað í dag. Auk þeirra sem nefndir voru hér að framan sátu þrír trúnaðarmenn starfsfólks sýslumannsembættanna fundinn sem var afar góður. Farið var yfir málið og var fulltrúum félagsins tjáð að innanríkisráðuneytið myndi vera í samráði við félagið um framkvæmdina.