Hvernig starfar ESB - Námskeið á vegum Félagsmálaskólans

Félagsmálaskólinn, í samstarfi við Evrópustofu, býður uppá námskeið um ESB sem ber heitið Hvernig starfar ESB? þann 27. mars frá 09:00 – 16:00 . 

Markmið námskeiðsins er að fara yfir Evrópumálin á aðgengilegan og áhugaverðan hátt út frá sjónarhóli Íslands.  Fjallað verður um ESB sjálft, sögu þess og helstu stofnanir og hvernig ákvarðanir eru teknar innan sambandsins.  Þá verður fjallað um tengsl Íslands og ESB við EES ásamt því að farið er yfir stefnu ESB í byggða- mennta- og vinnumarkaðsmálum.

Ávinningur þátttakenda
Á námskeiðinu munu þátttakendur öðlast yfirsýn og skilning á innviðum Evrópusambandsins og stofnunum þess og hvernig ákvarðanir eru teknar innan sambandsins.  Þátttakendur öðlast einnig þekkingu á samskiptum Íslands og ESB þar sem fjallað verður um EES samninginn og aðildarumsókn Íslands.   Þá kynnast þátttakendur helstu atriðum í nokkrum völdum stefnuflokkum sambandsins og öðlast færni í að meta sjálfstætt hvort hagsmunum Íslands sé betur borgið innan eða utan sambandsins.

Fyrir hverja er námskeiðið?
Alla sem hafa áhuga á Evrópumálum og þjóðmálum almennt. Engrar sérþekkingar er krafist.

Evrópustofa hefur staðið fyrir námskeiðum um ESB í samstarfi við Endurmenntun HÍ – auk símenntunarmiðstöðva víða um land.  Námskeiðin eru kennd af Auðbjörgu Ólafsdóttur, stjórnmála- og hagfræðingi og hafa þau hlotið afbragðs dóma hjá þeim nemendum sem tóku þátt.  Þá mun Halldór Grönvold taka hluta af kennslu námskeiðsins.

Námskeiðið verður haldið 27. mars frá 09:00 – 16:00, í Guðrúnartúni 1, 4. hæð.   Meðfylgjandi er dagskrá námskeiðs.  Námskeiðsgjaldið er kr. 9000.-  Innifalið eru námskeiðsgögn og hádegismatur.

Skráning fer fram á heimasíðu skólans www.felagsmalaskoli.is og er síðasti skráningardagur 19. mars.