22. maí 2014
Stofnun ársins valin
Rétt í þessu voru kynntar niðurstöður úr könnuninni Stofnun ársins og Fyrirtæki ársins 2014 í Hörpunni.
Stofnanir ársins eru þrjár, hver í sínum stærðarflokki:
Sjálfsbjargarheimilið er sigurvegari í flokki stórra stofnana með fleiri en 50 starfsmenn. Einkaleyfastofan er stofnun ársins í flokki meðalstórra stofnana þar sem starfsmenn eru 20-49. Héraðsdómur Suðurlands bar sigur út býtum í flokki stofnana þar sem starfsmenn eru færri en 20.
Hástökkvarinn í ár, eða sú stofnun sem hækkaði sig mest á milli ára er Sýslumaðurinn á Blönduósi en hann hækkaði sig um heil 43 sæti.
Í hverjum flokki hlutu efstu stofnanirnar sæmdarheitið Fyrirmyndarstofnun. Í flokki stærstu stofnana voru valdar fimm fyrirmyndarstofnanir. Þær eru auk Sjálfsbjargarheimilisins, Ríkisskattstjóri, Sérstakur saksóknari, Fjölbrautaskóli Suðurnesja og Heilbrigðisstofnun Þingeyinga.
Í flokki meðalstórra stofnana eru fyrirmyndarstofnanirnar einnig fimm að þessu sinni, þ.e. Einkaleyfastofa ásamt Menntaskólanum á Tröllaskaga og Landmælingum, Menntaskólanum að Laugarvatni og Skipulagsstofnun.
Í flokki minnstu stofnananna voru fyrirmyndarstofnanirnar þrjár, þ.e. Héraðsdómur Suðurlands og Hljóðbókasafn ásamt Sýslumanninum á Siglufirði.
SFR stéttarfélag í almannaþjónustu óskar starfsmönnum og stjórnendum þessara stofnana innilega til hamingju með þennan glæsilega árangur og óskar þeim öllum bjartar framtíðar.
Þetta er í níunda sinn sem SFR velur Stofnun ársins en könnunin er unnin af Capacent í samstarfi við VR, St.Rv. og fjármálaráðuneytið og er ein sú stærsta sinnar tegundar á landinu. Rúmlega 50 þúsund starfsmenn á almennum og opinberum vinnumarkaði fengu könnunina senda og er val á Stofnunum ársins byggt á svörum tæplega 14.000 opinberra starfsmanna.
Í könnuninni eru mældir þættir á borð við ánægju og stolt, starfsanda, trúverðugleika stjórnenda, launakjör, sjálfstæði í starfi, vinnuskilyrði, sveigjanleika vinnu og ímynd stofnunar. Niðurstöður könnunarinnar í ár sýna að mat starfsmanna á öllum þáttum hefur hækkað lítillega, nema þátturinn sem mælir ánægju með launakjör. Þar er enn talsverður munur á milli opinberra starfsmanna og félagsmanna VR ef kannanir félaganna eru bornar saman.
Niðurstöður könnunarinnar sýna að stærri stofnanir fá lakari útkomu en þær minni á öllum þáttum. Þegar bornar eru saman stærstu og minnstu stofnfanirnar munar miklu þeim stærri í óhag. Mikill munur er á þeirri einkunn sem starfsmenn minni stofnana gefa í flestum þáttum og starfsmenn þeirra stærri. Þetta á sérstaklega við um ímynd stofnunar, trúverðugleika stjórnenda, vinnuskilyrði og sveigjanleika.
Nánari upplýsingar um niðurstöður könnunarinnar má sjá hér.