3. nóvember 2014
Undirbúningur vegna kjarasamninga hafinn
Undirbúningur vegna næstu kjarasamninga er hafinn hjá SFR. Árni Stefán Jónsson, formaður félagsins hefur af því tilefni m.a. heimsótt vinnustaði til þess heyra áherslur félagsmanna og ræða kjarasamningana framundan, en flestir samningar félagsins eru lausir í apríl 2015. Árni segir fólk hafa sterkar skoðanir á kjaramálunum og honum sýnst þetta geta orðið erfiðir samningar framundan. „Það er ljóst að við munum leggja ofuráherslu á jöfnun launa starfsmanna á opinberum markaði og þess almenna. Þá finnst mér einnig mikið áhyggjuefni að enn skuli mælast kynbundinn launamunur hjá ríkinu. Þann launamun viljum við einnig burt.“
Í aðdraganda síðustu samninga var m.a. rætt um að næstu samningar yrðu mögulega til lengri tíma en vanalega, en Árni Stefán segist ekki sjá hvernig það gæti orðið mögulegt miðað við stöðuna í dag. Hann segir erfitt að treysta þeim stjórnvöldum sem nú séu við völd og því búist hann frekar við stuttum samningstíma og jafnvel átökum. Árni segir SFR félaga hafa beðið lengi eftir launajöfnun við almenna markaðinn.. „Ef sú leiðrétting fæst ekki við samningaborðið finnst mér meiri líkur en minni á því að það verði látið sverfa til stáls. Þannig er hljóðið í okkar fólki,“ segir Árni Stefán Jónsson, formaður SFR.
Aðspurður um það hvernig hann teldi mögulegt að jafna laun ríkisstarfamanna við almenna markaðinn meðan svo litlir peningar væru í ríkiskassanum sagði hann það alveg ljóst að þetta væri spurningin um forgangsröðun. „Við höfum horft á þessa ríkisstjórn ýta frá þér stórum tekjuöflunarleiðum eins og frægt er orðið og nú síðast boða þeir skattalækkanir. Þetta er ekkert annað en tekjuskerðingar á ríkissjóði sem stjórnin hefur valið sér. Þessu þarf að snúa til baka. Það er lífsnauðsynlegt fyrir samfélagið að hið opinbera hafi efni á því greiða sínu góða starfsfólki mannsæmandi laun. Það er eitt grundvallaratriði vel virkandi velferðarkerfis.“
Bjarkarárs - Ás styrktarfélag
Íbúðalánasjóður
Vinnumálastofnun og Umboðsmaður skuldara