Trúnaðarmannaráð samþykkti allsherjaratkvæðagreiðslu um verkfall

Trúnaðarmannaráð SFR kom saman í dag til að taka ákvörðun um allsherjaratkvæðagreiðslu um verkfall. Fundurinn var mjög fjölmennur og miklar umræður urðu um stöðuna sem upp er komin í kjaraviðræðum við ríkið og framkvæmd verkfalls ef til kemur.

Lagt var til að fram fari allsherjaratkvæðagreiðsla um boðun verkfalls og að henni skuli vera lokið 27. september 2015.

Atkvæðagreiðslan skal vera tvíþætt:

• Atkvæðagreiðsla um allsherjarverkfall sem tekur til allra félagsmanna og stendur yfir í ákveðinn tíma.
• Atkvæðagreiðsla um ótímabundið verkfall félagsmanna innan ákveðinna stofnana. Þeir félagsmenn sem vinna á þessum stofnunum munu greiða atkvæði sérstaklega um ótímabundið verkfall á sinni stofnun.

Tillagan var samþykkt einróma af trúnaðarmannaráði, enginn á móti og enginn sat hjá. Nú þegar verður hafist handa við undirbúning atkvæðagreiðslunnar.