11. febrúar 2016
Félags- og húsnæðismálaráðherra á fundi trúnaðarmanna
Eygló Harðardóttir félags- og húsnæðismálaráðherra hélt erindi á fundi trúnaðarmanna sem lauk rétt í þessu. Í erindi sínu fjallaði hún meðal annars um húsnæðismál og efnahag í tengslum við húsnæðisfrumvörp sem nú liggja fyrir. Í þeim er m.a. gert ráð fyrir hækkun húsaleigubóta sem tilraun til þess að jafna búsetustyrki og bæta þannig kjör þeirra sem mest þurfa á að halda. Tekjulægstu hóparnir eru í leiguhúsnæði sagði Eygló og hún lagði áherslu á að það þyrfti eninig að auka framboð á húsnæði.
Ein af tillögunum sem nú liggja á borðum ráðherra fjalla m.a. um hvernig stytta megi byggingatíma húsnæðis, bæði með það fyrir augum að auka framboðið hraðar en einnig til þess að minnka byggingakostnaðinn sem á endanum lendir á íbúunum sagði Eygló. Miklar og góðar umræður spunnust eftir erindi Eyglóar og sitt sýndist hverjum um ástandið á húsnæðismarkaðinum.
Á fundinum lagði laganefnd SFR fram tillögur að lagabreytingum sem trúnaðarmannaráðið samþykkti. Lagabreytingarnar verða lagðar fram á aðalfundi félagsins 30. mars næstkomandi. Að lokum kynnti Jóhanna Þórdórsdóttir fræðslustjóri SFR nýtt skráningarkerfi sem nýlega var tekið í notkun og er m.a. notað til skráningar á trúnaðarmannanámskeið og Gott að vita námskeiðin sem nú eru að hefjast.