NSO fundur í Kaupmannahöfn

SFR tekur þátt í samstarfi systurfélaga á Norðurlöndum sem kallast NSO (Nordiska statstjänstemannaorganisationen). Formaður og framkvæmdastjóri SFR sitja í dag fund samtakanna þar sem verið er að fara yfir þau verkefni sem heitast brenna á félögunum, ásamt því að undirbúa árlega ráðstefnu NSO sem haldin verður í Færeyjum síðar á árinu. Mikilvæg mál sem ofarlega eru á baugi eru staða efnahagsmála, staða flóttamanna á vinnumarkaði, samstarf stéttarfélaganna, atvinnurekenda og stjórnvalda, framkvæmd kjarasamninga og önnur þau stóru verkefni sem Norðurlöndin standa nú frammi fyrir.

Á fundinum nú er einnig unnið að dagskrá og skipulagning NSO ráðstefnunnar sem haldin verður í Færeyjum í ágúst á þessu ári. Meginþráður ráðstefnunnar verður Stjórnun hjá hinu opinbera í framtíðinni, en þar verður lögð áhersla á að fjalla um hvernig fyrirmyndarvinnustaður hjá hinu opinbera lítur út eða gæti litið út. Hvaða möguleika eigum við til að þróa stofnanir og þjónustu þeirra þannig að starfsmenn, samfélagið allt og hið opinbera njóti góðs af? Hvað einkennir stjórnun stofnana þar sem samheldni og starfsánægja ríkir, stofnunin mætir væntingum hins opinbera og almenningur er ánægður með þjónustuna?