Norræna velferðarvaktin

Fulltrúar SFR standa vaktina á lokaráðstefnu norrænu velferðarvaktarinnar á Nordica í dag. Á ráðstefnunni voru kynnt nokkur stór og mikilvæg verkefni og rannsóknir sem unnar hafa verið á undanförnum misserum.

Stefán Ólafsson prófessor rakti þar þróun efnahagsmála frá hruni í samanburði við önnur lönd. Í máli hans kom m. a. fram að atvinnuleysi á íslenskum vinnumarkaði hefði minnkað hraðar en annars staðar og væri minnst hér á landi í dag.
Guðný Björk Eydal prófessor greindi frá norrænni samanburðarrannsókn þar sem lagt var mat á hlutverk og þátttöku félagsþjónustunnar í neyðaraðstoð og hvort félagsþjónustunnar hafi formlega áætlun vegna ófyrirsjáanlegar atburða eða skyndilegri vá. Þá kynntu Sigríður Jónsdóttir og Håkan Nyman frá Heilbrigðis- og Velferðarráðuneytum Íslands og Svíþjóðar afar áhugavert verkefni þar sem bornir hafa verið saman 30 félagsvísar á 9 sviðum. Á síðunni nomi.bazooka.se er hægt að bera saman þætti eins og menntun, heilsu, atvinnuþátttöku, húsnæði o. s.frv. á milli Norðurlandanna á afar einfaldan hátt. Markmiðið er að vinna áfram að þessu verkefni og færa það nær rauntíma.

Norræna velferðarvaktin er eitt verkefnanna sem stofnað var til í tengslum við formennskuáætlun Íslands. Það er þriggja ára rannsóknarverkefni sem hefur staðið yfir 2014-2016 og miðar að því að styrkja og stuðla að sjálfbærni norrænu velferðarkerfanna, með því að efla rannsóknir og auka samvinnu og miðlun reynslu og þekkingar á milli Norðurlandanna.