1.maí - Sterkari saman!

Veðrið endurspeglaði fjölbreytileika lífsins í dag 1.maí á alþjóðlegum baráttudegi launafólks. Gríðarlega góð stemming var í kröfugöngunni og enginn lét það á sig fá þó að snjókorn og sólargeislar hafi tekist á um að fá á að fylgja göngufólki niður á Ingólfstorg. Það var vel tekið undir með kröftugum ræðum þeirra Ragnars Þórs Ingólfssonar formanns VR og Þórunnar Sveinbjarnardóttur formanns BHM sem hvöttu til samstöðu okkar allra í því verkefni að bæta kjörin og skapa saman það samfélag sem við viljum hafa.

Sólin náði yfirhöndinni þegar hljómsveitin Síðan skein sól steig á svið og Heimilistónar lögðu áherslu á nauðsyn þess að taka til í samfélagi okkar með Kúst og fæjó. Í lok fundar sungu allir saman við undirleik Lúðrasveitar verkalýðsins og lúðrasveitarinnar Svanur, baráttusöngva hins vinnandi manns, Maístjörnuna og Internasjónalinn.

Að loknum fundi  var fjölmennt í kaffi og kræsingar Kvennakórs Reykjavíkur í BSRB húsinu við Grettisgötu.