27. júní 2018
Jónsmessuferð LSFR til Vestmannaeyja
Lífeyrisdeild SFR fór í sína árlegu Jónsmessuferð fimmtudaginn 21. júní 2018. Lagt var af stað stundvíslega kl. 7:00 frá Grettisgötu 89, enda þurfti að ná Herjólfi í tæka tíð úr Landeyjarhöfn. Fullt var í ferðina og voru þrjár rútur sem flutt fólkið á milli staða. Farið var í skoðunarferð um Heimaey, meðal annars var farið út í Stórhöfða, á Ræningjatanga þar sem Tyrkir komu að landi og inn í Herjólfsdal. Þrátt fyrir rigningu og þoku á Stórhöfða ríkti gleði meðal ferðalanga. Um hádegisbil var safnið í Eldheimum skoðað og dýrindis fiskisúpa snædd. Eldheimar eru safn um eldgosið í eyjum og var byggt yfir hús sem grófust undir ösku. Þau hafa verið grafin upp að hluta og hægt er að skoða þau í Eldheimum.
Síðan var farið með Herjólfi kl. 16 til baka til lands og Lava Center á Hvolsvelli heimsótt. Þar var safnið skoðað og boðið upp á kvöldverðarhlaðborð. Lava Center er afar nútíma- og tæknileg afþreyingar- og upplifunarmiðstöð um eldvirkni og jarðskorpuhreyfingar á Íslandi. Þar mátti meðal annars fræðast um eldsumbrot og jarðskjálfta og hvernig landið okkar hefur orðið til á milljónum ára. Síðan lá leiðin til Reykjavíkur og voru ferðalangar komnir í bæinn rétt um kl. 21.