Fast tekið á ólögmætum uppsögnum

Hæstiréttur kvað nýlega upp mikilvægan dóm í máli félagsmanns SFR gegn sveitarfélaginu Ölfusi, en hæstiréttur staðfesti þar niðurstöðu héraðsdóms um að brottvikning félagsmanns okkar úr starfi hafi verið ólögmæt.

Málsatvik eru þau að félagsmanninum var vikið úr starfi í kjölfar atviks á sambýli sem átti sér stað milli hans og íbúa sambýlisins. Atvikið átti sér stað þegar félagsmaðurinn beitti sér samkvæmt starfsreglum vinnustaðar, í ástandi sem kallaði á að starfsmenn næðu stjórn á aðstæðum. Aðilar deildu um lögmæti uppsagnarinnar og hvort félagsmaðurinn ætti rétt á skaða- og miskabótum vegna hennar.

Héraðsdómur hafði áður dæmt á þann veg að sveitarfélagið Ölfus hefði brotið gegn rannsóknarreglu stjórnsýslulaga með því að láta ekki fara fram fullnægjandi rannsókn á atvikinu og þeim ávirðingum sem bornar voru á félagsmanninn, áður en honum var vikið úr starfi. Af þeim sökum hefði uppsögnin verið ólögmæt. Hæstiréttur staðfesti þetta nú í vikunni og taldi einnig að félagsmaðurinn ætti rétt á skaðabótum frá sveitarfélaginu vegna ólögmætrar uppsagnar. Skaðabætur voru dæmdar 2 milljónir kr., miskabætur 500 þúsund og auk þess var sveitarfélaginu gert að geriða allan málskostnað upp á 2,5 milljónir kr.

Málið hefur verið í um tvö ár í dómskerfinu og er þetta mikilvæg niðurstaða fyrir félagsmenn þar sem hér er tekið með óyggjandi hætti á ólögmæti fyrirvaralausra uppsagna. Í mörgum þeim störfum sem félagsmenn SFR sinna geta komið upp vafaatriði sem kalla á faglega skoðun og því er mikilvægt að hæstiréttur gagnrýni í dómi sínum framtaksleysi sveitarfélagsins í málinu. SFR fagnar því þessari niðurstöðu.