Fulltrúar SFR á þingi BSRB

Salir og gangar Hilton hótels Nordica hafa verið iðandi af lífi síðustu daga því um 200 fulltrúar aðildarfélaga BSRB hafa þar setið sitt 45. þing. SFR á þar 48 glæsilega fulltrúa sem allir hafa tekið virkan þátt í málefnastarfi og stefnumótun bandalagsins. Í stefnuræðu sinni í upphafi þings varð Elínu Björgu Jónsdóttur fráfarandi formanni tíðrætt um félagslegan stöðugleika og hefur sú umræða einkennt starf þingsins. Yfirskriftin er bætt lífskjör - betra samfélags. Tveir fyrstu dagar þingsins einkenndust af stífri málefnavinnu sem unnin var í hópum, en þar var m.a. mótuð stefna bandalagsins í Velferðar- og kjaramálum, umhverfismálum, menntamálum og fleiri mikilvægum málum sem félagsfólki hefur legið á hjarta. Þetta hefur verið afar gott þing og lærdómsríkt jafnt fyrir þá sem það sóttu í fyrsta sinn sem og gamlar kempur.