Trúnaðarmenn og fulltrúar

Fundur trúnaðarmanna- og fulltrúa Sameykis var haldinn í Gullhömrum í lok síðustu viku. Á fundinum kynnti Jón Sigurðsson fv. skólastjóri á Bifröst skýrslu samstarfshóps um félagsleg undirboð og brotastarfsemi á vinnumarkaði sem hann var í forsvari fyrir. Garðar Hilmarsson varaformaður fór yfir stöðuna í kjaramálunum og hjá honum kom fram að viðræður eru hafnar við alla stærstu viðsemjendur Sameykis. Þá kynnti Árni Stefán formaður merki félagsins og hlaut það góðar viðtökur fundarfólks. Kristín Erna tengiliður trúnaðarmanna minnti á kosningar trúnaðarmanna sem fram fara í vor samkvæmt nýjum lögum félagsins, en mikilvægt er fyrir allt starf félagsins að eiga stóran og sterkan hóp virkra trúnaðarmanna og því eru áhugasamir hvattir til þess að bjóða fram krafta sína þegar þar að kemur. Guðmundur Freyr fræddi fundarfólk um orlofsréttinn og að lokum fjallaði ráðgjafi frá Munum.is um tímastjórnun, markmiðasetningu og jákvæða hugsun. Fyrirlesturinn féll í góðan jarðveg enda efnið þess eðlis að það er okkur öllum nauðsyn að vera minnt á að setja okkur raunhæf markmið og halda jákvæðu viðhorfi.