Merki Sameykis á smærri skjá

Grettisgötu 89
105 Reykjavik
Ísland

525-840
sameyki@sameyki.is
6202690-3449

22. júlí 2020

Nýtt félagsliðanám í farvatninu

Ákveðið hefur verið að breyta námslokum félagsliða til að koma til móts við þær auknu kröfur sem gerðar eru til félagsliða að veita félagslegan stuðning innan velferðar- og heilbrigðisþjónustu, á öldrunarheimilum og við endurhæfingu í heimahúsum. Nám félagsliða verður því fært af 2. þrepi íslensks hæfniramma um menntun yfir á 3. þrep.

Hjá Starfsgreinaráði heilbrigðis-, félags- og uppeldisgreina (SHFU) hefur farið fram vinna við endurskoðun á hæfnikröfum sem gera má til starfa félagsliða á 3. hæfniþrepi. Jóhanna Þórdórsdóttir, fræðslustjóri Sameykis, situr í ráðinu sem einn af fulltrúum BSRB. Hún segir þetta mikilvægt skref þar sem vinnumarkaðurinn standi frammi fyrir miklum áskorunum sem tengjast m.a. lýðfræðilegum breytingum og tæknibreytingum. Hvað varðar lýðfræðilegu breytingarnar þá snúast þær um hækkandi lífaldur íslensku þjóðarinnar og breytta samsetningu þjóðarinnar þar sem hlutfall fólks af erlendum uppruna hefur farið vaxandi. Þetta kallar í auknum mæli á þverfaglega teymisvinnu allra sem starfa innan velferðar- og heilbrigðiskerfisins, þar á meðal félagsliða en þeir sinna m.a. einstaklingum með fötlun, geðraskanir, öldruðum og langveikum. En Alþjóðaheilbrigðismálastofnunin skilgreinir heilbrigði sem líkamlega, andlega og félagslega vellíðan.

Í frétt á vef stjórnarráðsins er haft eftir Lilju Alfreðsdóttur menntaog menningarmálaráðherra að með nýju námi er stefnt að því að félagsliðar axli meiri ábyrgð á stjórnun, framkvæmd og eftirliti með félagslegri umönnun og geti miðlað flóknari upplýsingum til fjölbreyttari hópa. „ Ávinningur þessa er aukin fagmennska og hæfni stéttarinnar til að veita félagslegan stuðning til ólíkra hópa um leið og skýrleiki námsleiðarinnar er aukinn með tilliti til tengsla við önnur skólastig, gæði og stíganda í námi,“ segir Lilja Alfreðsdóttir menntaog menningarmálaráðherra. Menntamálastofnun hefur farið yfir tillögur SHFU með hagsmunaaðilum og lagt til að námslokin verði færð upp um þrep. Mennta- og menningarmálaráðuneyti kynnti áformin í samráðsgátt stjórnvalda í vetur og bárust um það 24 umsagnir.

Ráðuneytið hefur svarað umsögnunum í samráðsgátt og leggur til það sólarlagsákvæði að nemendur sem voru virkir í námi á vorönn 2020 gefist kostur á að ljúka því samkvæmt eldri staðfestri námskrá. Hvatt verður þó til þess að eldri nemendur velji að ljúka námi af 3. hæfniþrepi til að geta mætt auknum kröfum í starfi. Jafnframt verður atvinnulíf hvatt til þess að meta námslok af báðum þrepum jafngild.

Stefnt er að því að kennsla hefjist samkvæmt nýrri námskrá haustið 2020 en ný námskrá er í staðfestingarferli. Þá er verið að endurskrifa starfstengda námskrá innan framhaldsfræðslukerfisins m.t.t. samfellu í námi og mati á hæfni. Það nám verður að fullu metið til nýrra námsloka í framhaldsskóla. Fullorðnir námsmenn munu því áfram geta valið sér námsfyrirkomulag samhliða starfi eða sem lið í starfsþróun

Þetta vefsvæði notar vafrakökur

Þessi vefur notar vafrakökur til að tryggja eðlilega virkni og notendaupplifun. Með því að nota hann samþykkir þú notkun þeirra. (Þessi tilkynning birtist vegna nýrra persónuverndarlaga.)