„Þetta er gríðarlegt áfall fyrir fólkið sem er að missa vinnuna sína í dag og fyrir fólkið sem mun þarna áfram sitja,“ segir Kári Sigurðsson, formaður Sameykis í viðtali við mbl.is í morgun. Hann segir óöryggið hafa mikil áhrif á starfsfólk borgarinnar, bæði vegna óvissu um störfin og vegna álagsins sem fylgir.

Okkar forgangsverkefni er að tryggja að þau fái skýrar upplýsingar um réttindi sín og ráðgjöf um næstu skref og þann stuðning sem þau þurfa á að halda. Jafnframt munum við óska eftir rökstuðningi fyrir hönd þeirra sem þess óska.

Mikilvægt er að félagsfólk okkar kynni sér réttindi sín og leiti ráðgjafar ef spurningar vakna.

Í uppsagnarfresti heldur starfsfólk áfram réttindum sínum samkvæmt ráðningarsamningi og kjarasamningi. Jafnframt heldur það réttindum sínum hjá Sameyki sem fullgildir félagsmenn út uppsagnarfrestinn.

• Laun, orlofsávinnsla, lífeyrisiðgjöld og önnur starfskjör haldast út uppsagnarfrestinn.
• Réttur til styrkja og þjónustu úr sjóðum félagsins helst, meðal annars vegna náms, starfsþróunar, heilsu, líkamsræktar eða endurhæfingar.
• Félagsmenn geta áfram nýtt sér þjónustu og fríðindi félagsins meðan á uppsagnarfresti stendur.
• Mikilvægt er að varðveita öll gögn sem tengjast uppsögninni, þar á meðal uppsagnarbréf og önnur samskipti.

Við veitum einnig ráðgjöf um uppsagnarfrest, réttindi samkvæmt kjarasamningum, mögulegan rökstuðning fyrir uppsögn og önnur atriði sem tengjast starfslokum.

Þú getur:

• bókað ráðgjöf hjá kjaradeild
• sent tölvupóst á kjaradeild@sameyki.is
• hringt í 525 8330

Við hvetjum allt það félagsfólk sem málið snertir til að hafa samband við okkur. Við erum hér fyrir ykkur og tilbúin til að veita upplýsingar, ráðgjöf og stuðning.