Fréttir og greinar

22. október 2014

Viltu öðlast grænni lífsstíl? Námskeið 23. okt. kl. 17-19:30

Go green Ásthildur B Jónsdóttir Ef svarið er já, skráðu þig þá núna, en á námskeiðinu 23. okt. verður fjallað um leiðir sem geta stuðlað að sjálfbærum lífsstíl. Þátttakendur fá þjálfun í að setja sér vörður og taka upphafs skref í átt að sjálfbærni. Verkefni sjálbærninnar verða brotin niður og sett upp í verkefnisáætlun sem þátttakendur taka með sér heim. Á námskeiðinu uppgötva þátttakendur að það er mun einfaldara og skemmtilegra að tileinka sér sjálfbærar venjur en þeir halda.

21. október 2014

Námskeið: Upplýsingaréttur almennings - Jafnréttislögin

Tvö áhugaverð námskeið á vegum Stofnunar stjórnsýslufræða og stjórnmála ætluð stjórnendum og starfsfólki hjá stofnunum ríkis og sveitarfélaga verða í boði í lok október. Annað fjallar um Upplýsingarétt almennings; Framkvæmd og túlkun upplýsingalaga nr. 140/2012. Hitt fjallar um Jafnréttislögin og áhrif þeirra á vinnumarkaði. Stendur einnig til boða í fjarnámi fyrir þá sem starfa á landsbyggðinni. Kennari á báðum námskeiðum er Kjartan Bjarni Björgvinsson lögfræðingur hjá EFTA dómstólnum. Hann hefur fengið afburða umsagnir þátttakenda í fyrri námskeiðum.

16. október 2014

Trúnaðarmannaráð SFR fundar

Nú stendur yfir fundur Trúnaðarmannaráðs þar sem fulltrúar félagsins hlýða m.a. á fyrirlestur Sigríðar Benediktsdóttur, framkvæmdastjóra fjármálastöðugleikasviðs Seðlabanka Íslands. Í erindi sínu fjallaði hún m.a. um gjaldeyris- og fjármagnshöft, skuldastöðu heimilanna og rakti þróunina frá því fyrir hrun.

16. október 2014

Ferðalangar athugið - Hvalfjarðargöngin lokuð

Hvalfjarðargöng verða lokuð vegna malbikunar í hálfan þriðja sólarhring núna í októbermánuði. Þetta er lengsta samfellda lokun ganganna frá upphafi og reyndar í fyrsta sinn sem slitlag er endurnýjað á akbrautum þar frá því þau voru opnuð í júlí 1998. Upprunalegt malbik endist þannig margfalt betur en ráð var fyrir gert.

13. október 2014

Sótthreinsitæknanám - kynning 21. október nk.

Nýtt nám fyrir sótthreinsitækna verður kynnt á Landspítalanum þann 21. október 2014 kl. 15:00 - 16:00 í kaffistofunni á Tunguhálsi. Námið er hugsað fyrir þá sem langar að vinna við sótthreinsun og dauðhreinsun á sjúkrastofnunum. Einnig verður kynnt svokölluð brúarleið fyrir þá sem nú þegar stunda þessi störf. Fulltrúi frá SFR verður á staðnum. Um er að ræða samstarfsverkefni Fjölbrautaskólans við Ármúla og Landspítala.

09. október 2014

Opinn fundur Heilbrigðis- og velferðarnefndar BSRB

Sigríður Líllý Baldursdóttir forstjóri Tryggingastofnunar verður gestur á opnum fundi Heilbrigðis- og velferðarnefndar BSRB, föstudaginn 10.okt. kl. 15:00 í fundarsal BSRB að Grettisgötu 89.

Gestir eru velkomnir og auk þess verður vefútsending á heimasíðu BSRB.

06. október 2014

Störfum hjá ríkinu fækkað um nærri 11%

Í frétt á vef BSRB kemur fram að störfum hjá ríkinu hefur fækkað um 10,6% frá 2008. Ef litið er aftur til aldamóta má sjá að starfsmönnum ríkisins hefur fjölgað um 5,6% frá árinu 2000 á meðan fjöldi starfandi á vinnumarkaðnum öllum hefur aukist um 11,8%. Tölurnar eru byggðar á upplýsingum frá Hagstofunni og Fjármálaráðuneytinu. Þessar upplýsingar stangast á við fullyrðingar Viðskiptaráðs sem nýverið efndi til fundar um stöðu og horfur í ríkisfjármálum. Þar kom fram að ríkisstarfsmönnum hefði fjölgað um 29% frá aldamótum. Einnig var tekið fram að aðhaldsaðgerðir síðustu ára hafi ekki fækkað starfsmönnum ríkisins frá 2008 til 2014 um nema 3%. Þessar fullyrðingar eru rangar.

01. október 2014

Laun á opinberum markaði enn 17 prósent lægri

Hluti mikilvægra niðurstaðna í launakönnun SFR er samanburður á launaþróun á milli félaga, þ.e. SFR og St.Rv. sem tilheyra opinberum vinnumarkaði og VR sem tilheyrir þeim almenna. Niðurstöður könnunarinnar nú í ár sýnir okkur að launabilið á milli markaða hefur ekki minnkað og engar vísbendingar eru um að svo verði.

01. október 2014

Málþing Sambands lífeyrisþega ríkis og bæja

SLRB logo Þann 13. október mun Samband lífeyrisþega ríkis og bæja efna til málþings þar sem fjögur erindi er varða hin ýmsu málefni lífeyrisþega verða flutt. Elín Björg Jónsdóttir formaður BSRB, Björk Vilhelmsdóttir borgarfulltrúi og formaður velferðarráðs, Ingibjörg Hjaltadóttir sérfræðingur í öldrunarhjúkrun á Landspítala og Erna Indriðadóttir fjölmiðlakona munu allar flytja erindi. Allir áhugasamir eru velkomnir á málþingið sem fer fram kl. 13 í húsi BSRB að Grettisgötu 89. Að loknum erindunum munu fyrirlesarar svara spurningum viðstaddra.

26. september 2014

Starfsmenn Fiskistofu mótmæla harðlega

Starfsfólk Fiskistofu fundaði í dag um fyrirhugaðan flutning stofnunarinnar og sendi í kjölfarið frá sér harðorða ályktun, þar sem ákvörðun sjávarútvegs- og landbúnaðarráðherra um flutning höfuðstöðva Fiskistofu er mótmælt. Í ályktuninni er ráðherra m.a. hvattur til þess að falla frá þessum hugmyndum sem eru bæði illa undirbúnar og misráðnar, segir í ályktuninni. Þá er þeim aðferðum sem beitt hefur verið við vinnslu málsins mótmælt enda sé þar verið að bjóta á réttindum starfsmanna. En áform eru uppi um að þvinga þá starfsmenn sem ekki hyggjast fylgja störfum sínum norður til að segja sjálfir upp.