Fréttir og greinar

22. október 2013

Ályktun stjórnar BSRB um fjárlagafrumvarp

Í frétt á vef BSRB er sagt frá því að á fundi stjórnar BSRB síðastliðinn föstudag var m.a. fjallað um stöðu mála í komandi kjarasamningsviðræðum, stöðuna í viðræðum um lífeyrismál og fjárlagafrumvarp ríkisstjórnarinnar. Þá sendi stjórnin frá sér ályktun þar sem meðal annars segir: „Tekjuskattslækkun á 2. skattþrepi mun aðeins koma þeim tekjuhærri til góða og í reynd hækka hlutfallslega skattbyrði þeirra sem lægst hafa launin.“

18. október 2013

Búið að opna fyrir skráningu á fræðslu trúnaðarmanna

Grunnnám trúnaðarmanna sem SFR og Starfsmannafélag Reykjavíkurborgar hafa haldið sameiginlega til margra ára hefur verið endurskoðað og er búið að setja upp þrjú námskeið veturinn 2013-2014. Þá er einnig boðið upp á fræðslumorgunn á undan fundi trúnaðarmanna þann 26. nóv. kl. 10-12:15 en þar verða tekin fyrir spurningar og svör sem tengjast kjarasamningi.

16. október 2013

Sameiginlegur fundur samninganefnda SFR

Fyrsti sameiginlegi fundur samninganefnda SFR stendur nú yfir hjá ríkissáttasemjara. Þar fara fulltrúar í öllum samninganefndum SFR yfir kröfugerðir og stilla saman strengi sína. Mikill hugur er í fólki varðandi samningana framundan.

16. október 2013

Raunfærnimat fyrir þá sem langar að fara í félagsliðanám

Viltu verða félagsliði og fá starfsreynslu, fyrra nám og vel leyst lífsverkefni metin til framhaldsskólaeininga? Ertu 25 ára eða eldri? Hefurðu starfað í 3 ár eða lengur með fötluðu fólki, öldruðum eða sjúkum? Hefurðu lokið a.m.k. 240 stundum í starfstengdu námi, til dæmis grunn- og framhaldsnámi fyrir stuðningsfulltrúa? Ef þú svarar öllum þessum spurningum játandi er upplagt fyrir þig að skrá þig í raunfærnimat félagsliða hjá Starfsmennt.

14. október 2013

Trúnaðarmannaráð SFR ályktar um kjaramál

Trúnaðarmannaráð SFR ályktaði um kjaramál á fundi sínum í síðustu viku. Ráðið gerir þá kröfu á stjórnvöld að næstu kjarasamningar feli í sér verulega kaupmáttaraukningu enda hafa launafólk lagt mikið á sig á síðast liðnum árum til þess að tryggja stöðugleika.

10. október 2013

Glæsihús í Munaðarnesi

Orlofshús félagsins í Bjarkarási 3 og 5 hafa undanfarna mánuði verið í algjörri endurbyggingu. Húsin hafa verið stækkuð til muna, en þau eru nú rúmir 80 fermeter og í þeim eru 3 herbergi. Allt innanstokks var endurnýjað og eru húsin hin glæsilegustu. Þá voru pallarnir í kringum húsin stækkaðir mikið og ekki skemmir útsýnið yfir Norðurá.

10. október 2013

Trúnaðarmannaráð ályktar

Fjölmennur fundur trúnaðarmanna var haldinn í gær. Þar kynnti Tómas Bjarnason frá Capacent m.a. niðurstöður launakönnunar, Kristinn Bjarnason hagfræðingur BSRB rakti innihald fjárlagafrumvarpsins og Árni Stefán Jónsson fór yfir stöðu mála í undirbúningi kjarasamningsviðræðnanna.

07. október 2013

SFR leggur áherslu á aðkomu stéttarfélaganna

Félag forstöðumanna, Fjármála- og efnahagsráðuneytið og Stofnun stjórnsýslufræða og stjórnmála efndi til morgunverðarfundar í dag. Þar kynnti Bjarni Benediktsson fjármála- og efnahagsráðherra fjárlagafrumvarp ríkisstjórnarinnar.

Árni Stefán Jónsson formaður SFR segir að á fundinum hafi fyrst og fremst komið fram almennar upplýsingar en það sé þó tvennt sem hann vilji sérstaklega benda á sem er mikilvægt fyrir félagsmenn SFR í náinni framtíð.“Í fyrsta lagi eru það áherslur ríkisstjórnarinnar um jöfnun kjara á vinnumarkaði, þ.e. samræmingu starfskjara milli opinberra starfsmanna og starfsfólks á almennum markaði. Þessu fagnar félagið að sjálfssögðu og býður fram krafta sína til að vinna að því markmiði. Enda hafi félagið bent á mismunun kjara síðast liðin ár m.a. með niðurstöðum launakannana.

02. október 2013

Kaldar kveðjur ríkisstjórnarinnar

„Fjárlagafrumvarp ríkisstjórnarinnar ber kaldar kveðjur til þjóðarinnar og starfsmanna ríkisins almennt,“ segir Árni Stefán Jónsson, formaður SFR. „Miklar væntingar stóðu til þess að ríkisstjórnin stæði við loforð sín varðandi það að veita nauðsynlegt fjármagn til Landspítalans."