Formaður BSRB gagnrýnir harðlega stefnu Reykjavíkurborgar í leikskólamálum

Sonja Ýr Þorbergsdóttir, formaður BSRB, gagnrýnir harðlega fyrirhugaðar breytingar Reykjavíkurborgar í leikskólamálum í nýjum pistli. Hún segir að hin svokallaða Reykjavíkurleið feli í sér þjónustuskerðingu og aukna fjárhagslega byrði á barnafjölskyldur, sem geti leitt til aukinnar stéttaskiptingar fremur en aukins jöfnuðar.

Í pistlinum rifjar Sonja Ýr upp að fyrirmyndin að breytingunum eigi rætur að rekja til svokallaðs Kópavogsmódels og segir: „Þannig varð til hið svokallaða Kópavogsmódel sem byggir á þeirri grunnhugmynd að draga úr vistunartíma barna með því að búa til fjárhagslegar refsingar fyrir lengri dvalartíma.“

Hún bendir á að Reykjavíkurl¬eiðin feli í sér gjaldfrjálsan 36 stunda dvalartíma á viku en að gjöld hækki stigvaxandi umfram það. „Reykjavíkurleiðin gengur út á gjaldfrjálsan 36 stunda dvalartíma en svo taki gjöldin stigvaxandi hækkunum umfram það. Útkoman er að hálftíminn umfram 8 stundir verður sá dýrasti á höfuðborgarsvæðinu,“ skrifar hún.

Að mati formanns BSRB standa margir foreldrar frammi fyrir erfiðu vali. „Flestir foreldrar standa frammi fyrir því að þurfa annað hvort að greiða mun meira fyrir leikskóladvöl eða draga úr vinnu með tilheyrandi tekjutapi,“ segir hún og bætir við að tekjutenging gjalda geti haft víðtæk neikvæð áhrif: „Innleiðing tekjutenginga á leikskólagjöldum hefur því veruleg áhrif á jaðarskatta barnafjölskyldna.“

Þá bendir hún á að því hærri sem tekjur foreldra eru, „þeim mun hærri skatt greiða þau hlutfallslega og barnabætur þeirra skerðast með hækkandi tekjum auk þess sem fjöldi foreldra á ekki rétt á þeim. Innleiðing tekjutenginga á leikskólagjöldum hefur því veruleg áhrif á jaðarskatta barnafjölskyldna.“

Sonja Ýr telur að í stað þess að bæta stöðu barna, foreldra og starfsfólks í leikskólum muni breytingarnar auka á álag og ójöfnuð. Hún hvetur borgaryfirvöld til að endurskoða stefnuna og leita raunverulegra lausna sem styrki leikskólastigið og styðji við barnafjölskyldur.

Lesa má pistil formanns BSRB í heild sinni hér.