4. mars 2026
Lagabreytingar og staða kjarasamninga rædd á fundi trúnaðarmannaráðs
Fundur var haldinn í trúnaðarmannaráði Sameykis á Grand Hótel í dag. Kári Sigurðsson, formaður Sameykis, bauð trúnaðarmenn velkomna til að ræða aðalefni fundarins sem var yfirferð lagabreytinga sem laganefnd félagsins hefur unnið að.
Kári fór yfir helstu verkefni Sameykis um þessar mundir og sagði félagið hafa lagt mikla áherslu á að verja réttindi opinberra starfsmanna með nánu samtali innan verkalýðshreyfingarinnar og með frétta- og greinaskrifum. Þar ber hæst áform ríkisstjórnarinnar um að fella úr gildi áminningarskyldu úr lögum um réttindi og skyldur starfsmanna ríkisins.
Kári Sigurðsson, formaður Sameykis.
„Sameyki hefur fjallað ítarlega um málið á miðlum sínum, rætt við starfsfólk og birt greinar og pistla til að vekja athygli á því. BSRB, BHM, Kennarasamband Íslands og Félag íslenskra hjúkrunarfræðinga hafa jafnframt fordæmt áformin og varað við því að afnám áminningarskyldu myndi veikja réttaröryggi opinberra starfsmanna verulega. Áminningarskyldan hefur um áratugaskeið tryggt að starfsmaður fái formlega áminningu og raunhæft tækifæri til úrbóta áður en gripið er til uppsagnar. Ef af þessum áformum verður mun réttarstaða opinberra starfsmanna veikjast verulega því hægt verður að reka fólk sem vinnur fyrir ríkið fyrirvaralaust,“ sagði Kári.
Hann sagði mikilvægt að verkalýðshreyfingin stæði saman í málinu og sagðist ánægður með þá samheldni sem hefði verið meðal stéttarfélaga og bandalaga þess í þessari baráttu. Þá ræddi Kári einnig um þá umræðu sem hefur skapast um veikindarétt opinberra starfsmanna. Hann benti á að Viðskiptaráð Íslands hafi staðið fyrir herferð þar sem réttindi opinberra starfsmanna í veikindum séu gagnrýnd með villandi hætti.
„Á sama tíma og fólk vinnur undir miklu álagi og veikindi aukast á vinnumarkaði vegna manneklu hefur Viðskiptaráð hafið herferð gegn veikindarétti opinberra starfsmanna. Þegar betur er að gáð stenst samanburður ráðsins hins vegar enga skoðun. Þessi málflutningur er einfaldlega á mjög lágu plani,“ sagði Kári.
Þá vísaði hann til málþings Sameykis sem haldið var í tengslum við Stofnun ársins þar sem fjallað var um veikindi og ástæður þeirra á vinnumarkaði.
„Langtímaveikindi fólks eru oft tilkomin vegna mikils álags í starfi. Sérfræðingur sem kom hingað til lands og hélt erindi á málþinginu fjallaði um hvers vegna fólk fer í veikindi og benti á að kulnun væri ekki síst tengd miklum metnaði fólks til að standa sig vel í starfi. Þetta fannst mér athyglisvert og við þurfum að ræða þetta betur á stærri vettvangi,“ sagði Kári.
Garðar Svansson, trúnaðarmaður og formaður laganefndar Sameykis, sagði störf nefndarinnar hafa verið öflug á árinu og fór hann yfir þær lagabreytingar sem laganefndin leggur til fyrir aðalfund félagsins sem haldinn verður 26. Mars nk.
Garðar Svansson, trúnaðarmaður fór yfir tillögur laganefndar að lagabreytingum.
„Við yfirferð laganna hefur komið í ljós að í sumum þeirra er ákveðið ósamræmi sem þarf að bæta úr. Annars vegar þarf að skýra orðalag betur og hins vegar að gera það kynhlutlausara,“ sagði Garðar. Hann fór einnig yfir aðrar helstu tillögur nefndarinnar að breytingum á lögum félagsins. Þar er meðal annars lagt til að kjörtímabil stjórnarmanna verði fjögur ár en kosningar fari fram á tveggja ára fresti. Þá verði í hvert skipti kosnir sjö fulltrúar í stjórn til fjögurra ára í senn. Hann sagði að nefndin legði til að formaður félagsins verði kosinn í sérstakri kosningu til fjögurra ára í senn og geti að hámarki setið í embætti í tólf ár. Þá þurfi frambjóðendur til stjórnar og til formanns að leggja fram 50 meðmælendur og frambjóðendur til stjórnarsetu 25 meðmælendur. Varamenn í stjórn þurfa hins vegar ekki að safna meðmælendum.
Garðar sagði jafnframt mikilvægt að tekið væri mið af samsetningu félagsins við uppstillingu stjórnar og að starfsfólk Sameykis sitji ekki í stjórn félagsins.
„Okkur í nefndinni finnst nauðsynlegt að litið verði til þess hvernig félagið er samsett þegar stjórn er skipuð, meðal annars með tilliti til kynjahlutfalls. Í Sameyki eru um 65 prósent félagsmanna konur og teljum við rétt að hafa það í huga. Þá leggjum við einnig til að starfsfólk félagsins geti ekki á sama tíma setið í stjórn þess og verði því ekki kjörgengt,“ sagði Garðar.
Borghildur Sigurðardóttir, fjármálastjóri Sameykis, greindi trúnaðarmönnum frá reikningum félagsins og sagði að orlofssjóður stæði vel þrátt fyrir mikla uppbyggingu orlofseigna og sagði að rekstur félagsins stæði vel almennt. Ársreikningar verða lagðir fram til samþykktar á aðalfundi Sameykis. Bæði ársskýrsla og ársreikningar verða tiltækir og hægt að lesa yfir tíu dögum fyrir aðalfund á Mínum síðum Sameykis.
Borghildur Sigurðardóttir, fjármálastjóri Sameykis, kynnti reikninga félagsins sem lagðir verða fram á aðalfundi Sameykis 26. mars.
Að loknu kaffihléi sköpuðust líflegar umræður um stefnu Sameykis, hlutverk þess og þá þjónustu sem það veitir félagsfólki sínu.
Sjá frétt frá málþingi Sameykis hér fyrir neðan.
