26. september 2014
Félagsráð fundar
Á fundi Félagsráðs SFR sem haldinn var í gær hélt Indriði H. Þorláksson, fyrrv. ríkisskattstjóri erindi sem hann kallaði Ríkisfjármál og skattapólitík. Erindi hans var afar áhugavert enda byggt á áratuga reynslu og mikilli þekkingu. Indriði talaði bæði um fortíð og framtíð í erindi sínu og sagðist m.a. leggja lítið upp matarskattsumræðunni í dag. Stóru málin fyrir ríkisfjármálin væri það að tekjur fyrir auðlindirnar skiluðu sér til þjóðarinnar.
Að loknu áhugaverðu erindi og umræðum greindi Árni Stefán Jónsson formaður SFR frá starfsemi félagsins á undanförnu ári, og einnig undirbúninginn fyrir komandi kjarasamninga sem nú er hafinn. Á dagskrá haustsins sagði Árni m.a. vera það að heimsækja vinnustaði og halda morgunverðarfundi með félagsmönnum. Það væri mikilvægt nú sem áður að hlusta vel á félagsmenn og gefa þeim tækifæri til að koma sínum skoðunum og áherslum til stjórnar félagsins.
Á fundinum var einnig farið yfir fjármál félagsins eins og lögin um Félagsráð gera ráð fyrir og kosið í fastanefndir s.s. ritnefnd, fræðslunefnd, jafnréttisnefnd, menningar- og skemmtinefnd og laganefnd. Skipan nefnda má sjá hér.