Grafalvarleg staða

Nú stendur yfir fundur Félagsráðs SFR. Stóra málið á dagskrá fundarins er sú grafalvarlega staða sem nú er uppi í kjarasamningsviðræðunum. Síðasti fundur samninganefnda SFR, SLFÍ og LL með sáttasemjara var um miðja viku en skilaði litlu. Ekki hefur verið boðaður annar fundur.

Atkvæðagreiðsla um verkfallsaðgerðir er hafin og mun hún standa fram til kl. 12:00 þann 29. september. Fyrirhugaðar verkfallsaðgerðir munu hafa víðtækar afleiðingar á þeim 170 stofnunum sem félagsmenn SFR starfa. Áætlað er að hefja allsherjarverkfall þann 15. október ef ekki semst og mun sú törn standa í ákveðna daga í október og nóvember hjá félagsmönnum SFR á öllum stofnunum, eða um 3500 manns. Starfsfólk ákveðinna stofnana mun hins vegar leggja niður vinnu alfarið frá 15. október, en þetta er starfsfólk sýslumannsembættanna, tollstjóra, ríkisskattstjóra og Landspítala. Félagsmenn SFR eru burðarás í þjónustu þessara stofnana og má gera ráð fyrir að verkfall þeirra muni hafa mikil og alvarleg áhrif á starfsemi þeirra, hvort heldur sem er varðandi útgáfu vegabréfa, leyfisveitingar eða aðra þjónustu. Eins og flestir vita er SFR stéttarfélag í samstarfi við Sjúkraliðafélag íslands og Landsamband lögreglumanna í kjarasamningsviðræðunum og eru verkföll sjúkraliða skipulögð á sama tíma og SFR félaga. Sameiginlegt verkfall þessara félaga á Landspítalanum mun þýða að rúmlega 1000 manns leggja niður störf þar.