19. október 2016
Tilraunaverkefni um styttingu vinnuvikunnar - verður þín stofnun með?
Auglýst er eftir umsóknum frá vinnustöðum hjá ríkinu um þátttöku í tilraunaverkefni ríkisins og BSRB um styttingu vinnutíma og eru vinnustaðir um allt land hvattir til þátttöku. Umsóknarfrestur rennur út 7. nóvember næstkomandi.
Valdir verða fjórir vinnustaðir þar sem vinnustundum verður fækkað úr 40 á viku í 36 stundir án þess að til launaskerðingar komi. Stefnt er að því að tveir þeirra séu vaktavinnustaðir. Tilraun um styttingu vinnutíma mun standa yfir í eitt ár, frá 1. febrúar 2017 til 1. febrúar 2018, á þeim vinnustöðum sem taka þátt.
Í starfshópi um tilraunaverkefnið sitja Kolfinna Jóhannesdóttir formaður, skipuð af félags- og húsnæðismálaráðherra, Helgi Valberg Jensson frá fjármála- og efnahagsráðuneytinu og Sonja Ýr Þorbergsdóttir frá BSRB.
Hlutverk hópsins er m.a. að velja vinnustaði til þátttöku í tilraunaverkefninu og meta árangur þess. Starfshópurinn mun skila lokaskýrslu um verkefnið eigi síðar en í lok september 2018. Starfsmaður verkefnisins er Ása Guðbjörg Ásgeirsdóttir sérfræðingur hjá velferðarráðuneytinu.
Nánari upplýsingar má finna á vef Velferðarráðuneytisins.
Við mat á umsóknum verða meðal annars eftirfarandi viðmið höfð til hliðsjónar:
• að stöðugildi á vinnustaðnum séu 20 eða fleiri
• a.m.k. 30% starfsmanna á vinnustaðnum séu í aðildarfélögum BSRB
• fjöldi svipaðra starfa á vinnustaðnum
• vinnufyrirkomulag - vaktavinna eða dagvinna
• að meirihluti starfsmanna sé í 70–100% starfshlutfalli
Ástæða þess að horft er til þess hvort það starfi 20 eða fleiri er einfaldlega svo að mælingar takist vel og viðmið um að a.m.k. 30% starfsmanna á vinnustaðnum séu í aðildarfélögum BSRB er að rekja til þess að tilurð tilraunaverkefnisins er í tengslum við gerð kjarasamninga aðildarfélaga BSRB við ríkið sbr. viljayfirlýsingu ríkisstjórnarinnar sem afhent var Elínu Björgu á síðasta þingi BSRB.