26. apríl 2018
Sterkari saman í kröfugöngum um allt land á 1.maí
Það er með óbilandi samstöðu sem íslenskt launafólk hefur náð að bæta kjör sín á síðustu árum og áratugum. Eins og rannsóknir sýna hefur ójöfnuður farið vaxandi hin síðustu ár og því mikilvægara en oft áður að launafólk standi þétt saman í baráttunni fyrir betri kjörum og réttlátara samfélagi.
Við sýnum samtakamáttinn með því að fjölmenna í kröfugöngur og á baráttufundi um allt land á þessum alþjóðlega baráttudegi verkalýðsins 1.maí.
Yfirskrift kröfugöngunnar í Reykjavík er "Sterkari saman" og er dagskráin eftirfarandi:
Safnast verður saman á horni Laugavegar og Snorrabrautar klukkan 13:00. Kröfuganga hefst klukkan 13:30. Lúðrasveit verkalýðsins og Lúðrasveitin Svanur leika í göngunni.
Útifundur á Ingólfstorgi verður settur klukkan 14:10. Þar munu Ragnar Þór Ingólfsson, formaður VR, og Þórunn Sveinbjarnardóttir, formaður Bandalags háskólamanna, halda erindi. Þá munu Síðan skein sól og Heimilistónar flytja tónlistaratriði. Öll dagskráin verður túlkuð á táknmáli. Kolbrún Völkudóttir túlkar söng á táknmáli. Fundarstjóri verður Þórarinn Eyfjörð.
Að útifundi loknum verður 1. maí kaffi í BSRB húsinu, félagsmenn hjartanlega velkomnir.
Í Stykkishólmi hefst baráttufundurinn kl. 13.30 á Hótel Stykkishólmi. Kynnir er Helga Hafsteinsdóttir formaður SDS. Ræðumaður er Drífa Snædal, framkvæmdastjóri SGS. Tónlistarskóli Stykkishólms og rappararnir Jói P og Króli skemmta fundargestum og boðið er uppá kaffiveitingar.
Í Grundarfirði hefst baráttufundurinn í Samkomuhúsinu kl. 14.30. Kynnir er Garðar Svansson stjórnarmaður SFR. Ræðumaður er Drífa Snædal og Tónlistarkóli Grundarfjarðar og rappararnir Jói P og Króli skemmta. Kaffiveitingar að hætti Gleym-mér-ei.
Í Snæfellsbæ hefst fundurinn kl. 15.30 í félagsheimilinu Klifi. Ræðumaður er Drífa Snædal. Tónlistarskóli Snæfellsbæjar og rappararnir Jói P og Króli skemmta fundargestum. Kaffiveitingar að hætti eldri boragara.