Störf undanþágunefnda í undirbúningi

Undirbúningur vegna yfirvofandi verkfalls er í fullum gangi samhliða kjarasamningsviðræðum. Eitt af því sem þarf að huga að eru undanþágunefndir. Störf félagsmanna á undanþágulista eiga einungis að taka til „nauðsynlegustu öryggisgæslu og heilbrigðisþjónustu“ samkvæmt 5. tl. 19. gr. laga nr. 94/1986. 

Sé verkfall hafið er heimilt að kalla starfsmenn, sem eru í verkfalli, tímabundið til vinnu í þeim tilgangi að afstýra neyðarástandi. Undanþágunefnd ákveður hverjir skulu kvaddir til starfa, en í nefndinni er einn fulltrúi tilnefndur af stéttarfélagi og annar af viðsemjenda. Verið er að ganga frá því hverjir sitja í nefndunum. Tekið verður við umsóknum rafrænt og verður umsóknareyðublað birt þegar nær dregur yfirvofandi verkfalli.

Undanþágunefndir hefja ekki störf fyrr en ljóst er að verkfall brestur á, ennþá eru samningaviðræður í gangi. En verkfall hefst á miðnætti aðfararnótt mánudagsins 9. mars ef ekki semst fyrir þann tíma.