Nýtt orlofshús Sameykis á Tenerife til útleigu á morgun

Sameyki býður félagsfólki sínu upp á nýjan orlofskost á Tenerife. Um er að ræða raðhús, Villa Portofino 5B, sem er 186 fermetrar á tveimur hæðum auk þaksvala. Í húsinu eru þrjú svefnherbergi, bílskúr og garður með einkasundlaug. Húsið er staðsett í vesturhluta Los Cristianos í um 10-15 mínútna göngufjarlægð frá ströndinni og í um 15 mínútna akstursfjarlægð frá flugvellinum Tenerife Sur. Stutt er í alla helstu þjónustu og verslanir en beint á móti húsinu er verslunarkjarni.

Á jarðhæðinni er stofa, vel búið eldhús, baðherbergi með sturtu og svefnherbergi. Hægt er að opna út í garð úr svefnherberginu. Á annarri hæðinni eru tvö rúmgóð svefnherbergi sem hvort um sig eru með sér baðherbergi. Útgengt er úr báðum svefnherbergjum á svalir. Öll rúm eru tvíbreið. Gistipláss er fyrir 8 manns í húsinu, fyrir 2 í hvoru svefnherbergi á efri hæðinni, 2 í svefnherbergi á neðri hæð og 2 í svefnsófa. Stærri svalir eru á þaki hússins með útsýni yfir svæðið. Í húsinu er bílakjallari.

Leigutímabil: Leigjandi hefur afnotarétt af orlofshúsinu frá kl. 16:00 á komudegi til kl. 10:30 á brottfarardegi. Skiptidagar eru fimmtudagar og leigutímabil er ein vika. Opnað verður fyrir 22 vikur eða frá 21. desember til 23. maí.

Opnað verður fyrir útleigu Villa Portofino 5B á Orlofshúsavef Sameykis föstudag 15. desember kl. 16:00.