24. mars 2026
Sameyki tekur undir með gagnrýni Verkalýðsmálaráðs Samfylkingarinnar
Daði Már Kristófersson, fjármálaráðherra, Gylfi Þór Gíslason, formaður Verkalýðsmálaráðs Samfylkingarinnar og Kristrún Frostadóttir, forsætisráðherra og formaður Samfylkingarinnar. Samsett mynd/Sameyki
Sameyki tekur undir með formanni Verkalýðsmálaráðs Samfylkingarinnar, Gylfa Þór Gíslasyni, sem ber von um að Kristrún Frostadóttir, forsætisráðherra, beiti sér gegn fyrirhuguðum breytingum Daða Más Kristóferssonar, fjármálaráðherra, á réttindum opinberra starfsmanna. Áformin fela í sér afnám áminningarskyldu úr lögum um réttindi og skyldur starfsmanna ríkisins.
Gylfi Þór hefur gagnrýnt frumvarpið harðlega og telur að með því sé vegið að grundvallarréttindum opinberra starfsmanna. Hann bendir á í frétt á Vísi að skort hafi á raunverulegu samráði við verkalýðshreyfinguna og að slík réttindaskerðing sé óásættanleg án víðtæks samtals við aðila vinnumarkaðarins. Verkalýðsmálaráð Samfylkingarinnar hefur sent frá sér ályktun um áform ríkisstjórnarinnar þar sem kemur fram hörð gagnrýni á ætlun ríkisstjórnarinnar að skerða atvinnuleysisbótatryggingar og afnema áminningarskyldu. Það feli í sér alvarlega einhliða réttindaskerðingu launafólks, grafi undan samráði aðila vinnumarkaðarins og ógni stöðugleika og öryggi á íslenskum vinnumarkaði.
Daði Már Kristófersson fjármálaráðherra hefur hins vegar varið frumvarpið og sagt breytingarnar vera liður í einföldun regluverks og umbótum í mannauðsmálum ríkisins. Hann heldur því fram að réttindi starfsmanna verði áfram tryggð, meðal annars með andmælarétti og möguleikum til að leita réttar síns.
Sameyki hafnar þessum sjónarmiðum fjármálráðherra og leggur áherslu á að áminningarskyldan sé ekki formsatriði heldur lykilþáttur í ráðningarvernd opinberra starfsmanna. Afnám hennar myndi veikja réttaröryggi starfsfólks og grafa undan trausti og fagmennsku í opinberri þjónustu og stuðla að afregluvæðingu vinnumarkaðarins. Það er þvert á módel vinnumarkaðarins á hinum Norðurlöndunum sem Ísland ber sig saman við. Slík afregluvæðing veikir vinnumarkaðinn allan og væri óhugsandi aðför að réttindum launafólks hjá frændþjóðum okkar í Finnlandi, Svíþjóð, Noregi og Danmörku þar sem miðast er við samþykktir Alþjóðavinnumálastofunarinnar (ILO). Ef ríkisstjórn Kristrúnar Frostadóttur tekst að veikja réttindi launafólks með þessum hætti væri uppsagnavernd starfsfólks veikust hér á landi af öllum Norðurlöndunum.
Sameyki hvetur stjórnvöld til að draga áformin til baka og tryggja raunverulegt samráð við verkalýðshreyfinguna áður en ráðist er í breytingar sem snerta grundvallarréttindi launafólks.
Sjá umfjallanir um málið
