Reykjavík 29. september 2020
Kæri félagi!
Í síðustu kjarasamningum náðist langþráður áfangi með styttingu vinnuvikunnar. Þessum áfanga ber að fagna en verum þó meðvituð um að árangurinn er ekki alveg í hendi. Það á eftir að útfæra styttinguna á hverjum vinnustað fyrir sig og mikilvægt er að vandað sé til verka. Þess vegna sendum við öllum félagsmönnum þetta bréf með upplýsingum um hvernig á að standa að styttingunni í dagvinnu og hver markmiðin eru. Í framhaldi hefst vinna við styttingu vinnuvikunnar hjá vaktavinnufólki.
Meginmarkmiðið, þegar stytting vinnuvikunnar er undirbúin á hverjum vinnustað, er að finna leiðir til að endurskipuleggja vinnuna þannig að hægt sé að stytta vinnuvikuna niður í 36 stundir á viku. Þessar breytingar munu stuðla að betri heilsu, betri samræmingu vinnu og einkalífs og auknum lífsgæðum starfsfólks. Svo að vel takist til verður að tryggja góðan undirbúning og þátttöku allra á vinnustaðnum, enda enginn sem þekkir verkefnin betur en starfsfólkið sem sinnir þeim alla daga.
Vinnutímanefnd leiðir verkið á hverjum vinnustað
Fyrsta skrefið í átt að styttingu vinnuvikunnar er að stofna vinnutímanefnd með fulltrúum starfsfólks og stjórnenda á hverjum vinnustað sem undirbýr breytinguna og leiðir samtalið á vinnustaðnum. Vinnutímanefndin boðar til samtals þar sem hún skapar umræðuvettvang fyrir allt starfsfólk um tækifæri og nýjar leiðir í bættu vinnutímafyrirkomulagi.
Í því samtali þarf að velta upp spurningum á borð við hvernig bæta megi skipulag vinnunnar, verklag, samvinnu, verkefnadreifingu, stjórnun og vinnubúnað og nýta tæknina betur til að stytta vinnuvikuna. Samhliða þessu þarf að tryggja að starfsfólk geti veitt jafn góða þjónustu og fyrir breytingarnar. Þá þarf að ræða fyrirkomulag styttingarinnar á vinnustaðnum, til dæmis hvort styttingin sé tekin út daglega eða vikulega og þá á hvaða dögum og á hvaða tíma dags.
Hefðbundin neysluhlé (tveir kaffitímar á dag og hádegisverður)
Fjölmargar spurningar hafa borist um hvort neysluhlé falli niður í kjölfarið á styttingu vinnuvikunnar í 36 stundir. Þannig virðist umræðan á sumum vinnustöðum snúast um hvort vinnuvikan verði stytt með því einu að taka út tímasett hlé. Það er misskilningur þar sem meginmarkmiðið með breytingunum er að starfsfólk og stjórnendur finni leið til að skipuleggja vinnuna sjálfa betur. Að stytta vinnuvikuna í 36 tíma gerist með því að hefðbundin neysluhlé eins og kaffitímar fyrir og eftir hádegi og hádegishlé verði nú hluti af vinnutímanum.
Tvö dæmi til útskýringar:
Dagleg stytting
-Hver vinnudagur styttur í upphafi eða lok dags og hefðbundin neysluhlé eru hluti af vinnutímanum.
Dæmi: Vinnutími kl. 8:00 – 15:12.
Vikuleg stytting
-Samfelld stytting tekin út á einum vinnudegi í viku og hefðbundin neysluhlé eru hluti af vinnutímanum.
Dæmi: Starfsmaður vinnur kl. 8:00-16:00 fjóra daga vikunnar en einn dag í viku vinnur hann frá kl. 8:00-12:00.
Nýtt skipulag vinnutíma
Að loknu samtali allra á vinnustaðnum tekur vinnutímanefnd á viðkomandi vinnustað umræðuna saman og gerir tillögu að nýju fyrirkomulagi vinnutíma. Tillöguna, eða eftir atvikum tillögur, skal kynna öllum á vinnustaðnum og að loknu því samtali er tillagan borin undir atkvæði starfsfólks. Breytingin tekur gildi á þeim tíma sem starfsfólk hefur komið sér saman um en ekki síðar en 1. janúar 2021.
Margir sem hafa upplifað styttingu vinnuvikunnar á eigin skinni nefna meðal annars að hún feli í sér mun meiri lífsgæði en þeir höfðu reiknað með. Einnig fannst starfsfólki það hafa meiri tíma fyrir sig og fjölskyldu sína og fann auk þess jákvæðan mun á andlegri og líkamlegri heilsu. Það er krefjandi verkefni að undirbúa vinnutímabreytingar sem fela í sér 4 klukkustunda vinnustyttingu á viku en það er sannarlega til mikils að vinna fyrir starfsfólkið, vinnustaðinn og samfélagið í heild sinni. Gangi ykkur öllum vel!
Kveðja
Árni St. Jónsson Garðar Hilmarsson
formaður Sameykis varaformaður Sameykis
Fyrir starfsfólk ríkisins á www.betrivinnutimi.is
Fyrir starfsfólk sveitarfélaga (samband.is/verkefnin/kjara-og-starfsmannamal/betri-vinnutimi/dagvinnufolk/
Fyrir starfsfólk Reykjavíkurborgar (reykjavik.is/betrivinnutimi/dagvinna)