Höfuð, herðar, hné og tær!

Vinnuumhverfið hefur áhrif á starfsfólk frá toppi til táar. Horfa þarf á heildarmyndina og huga að þáttum sem hafa áhrif á andlega og líkamlega heilsu.

VIRK og Vinnueftirlitið hafa tekið höndum saman og standa fyrir vitundarvakningu undir yfirskriftinni Höfuð, herðar, hné og tær um mikilvægi þess að byggja upp traust og heilbrigða vinnustaðamenningu sem leggur grunn að öryggi og vellíðan starfsfólks. Áherslan er ekki hvað síst á mikilvægi þess að tekið sé vel á móti ungu fólki inn á vinnumarkaðinn.

Vefsíðan hhht.is er hryggjarstykki vitundarvakningarinnar. Á vefsíðunni má finna gagnlegar upplýsingar og góð ráð um það hvernig við byggjum upp traust, stuðlum að fjölbreytileika og inngildingu og eflum jákvæð samskipti í vinnunni. Neðst á hhht.is má einnig finna hlekk á veggspjald vitundarvakningarinnar til útprentunar og hlekk á bakgrunn fyrir síma.

Sjá nánar á hhht.is og virk.is.